Die Weg

 

Ons einddoel

Weens omstandighede sal daar vir die volgende twee dae nie 'n "Boodskap vir die dag" wees nie. In die plek daarvan is 'n aanhaling uit "Die Navolging van Christus" deur Thomas À Kempis. Uit die Latyn vertaal deur Dr AS Geyser.

Laat die arbeid jou nie breek, wat jy onderneem het terwille van My,
en laat verdrukkinge jou nimmer neerwerp nie,
maar word deur my belofte, in elke omstandigheid, gesterk en vertroos.
Ek het mag genoeg om jou te vergoed bo alle maat en perk.

Jy sal nie lank hier arbei nie, en nie vir altyd onder smart gebuk gaan nie.
Wag nog net 'n klein tydjie, en jy sal die end van die kwellinge sien.
Eenmaal sal die uur aanbreek, dat alle moeite en onrus sal staak.

Klein en kort is alles wat verbygaan met die tyd.
Doen wat jy moet,
werk in my wingerd met trou,
en Ek sal jou beloning wees.
Skryf, lees, sing, sug, swyg, bid,
verdra die teenspoed met manmoedigheid;
die ewige lewe is hierdie dinge en groter stryd nog werd.

Vrede sal op één dag kom, aan die Here alleen bekend,
en daar sal nie 'n dag of nag, soos nou, wees nie,
maar ewige lig en eindelose glans, en vaste vrede en ewige rus.
 

Kopiereg: Lukas du Preez (dieweg.co.za). Ontwikkel op w3.css